Juve Del Piero, në krizë për kontratën e re

nga **LIHI** Thu Aug 09 2007, 21:26

Klubi injoron kërkesat e lojtarit-simbol të bardhezinjve

Telashe të tjera te Juvja, madje telashe të mëdha. Sepse objekt i problemit kësaj here është kapiteni Alesandro Del Piero. Pra ai që cilësohet nga drejtuesit si flamuri historik dhe i palëvizshëm, njeriu i së tashmes dhe i së ardhmes. Në fushë, për momentin, dhe në zyrë më vonë. Mbase Boniperti i viteve 2000. Pra, një person tek i cili besohet dhe duhet besuar shumë. Por ja që... Takimi Por ja që ndodhi që të dielën, më 6 gusht, sikurse u bë e ditur nga "Sky", gjatë një ditë feste, u takuan në selinë e Juves Zhan Klod Blanku dhe Alesio Seko, për Juven, Stefano Del Piero, vëllai i madh i Aleksit dhe agjenti i tij, në mbrojtje të interesave të kampionit. Nuk bëhej fjalë për bisedime, por ishte një takim paraprak për të kuptuar se çfarë kërkojnë të dyja palët.

Plani i Del Pieros është i thjeshtë. Ai dëshiron të ketë një kontratë deri më 2010-n, pra një zgjatje edhe për dy vite të tjera të kontratës aktuale, e cila i përfundon më 30 qershor 2008. Më pas, mund të nënshkruajë kontratë një-vjeçare si Maldini. Pra nëse e ndien veten në gjendje do të vazhdojë të luajë, përndryshe do t'i varë këpucët në gozhdë. Strategjia Për të marrë dy, Stefano, si çdo lojtar i mirë, kërkon tre. Një marrëveshje 3-vjeçare (me përfundim më 2011-n) dhe më pas do të shihet. Një shifër vjetore më e ulët në krahasim me atë që Aleksi merr tani (rreth 5 milionë euro në sezon) por me siguri nuk bëhet fjalë për një shifër të vogël. Një strategji që duket si një bllof në një tryezë pokeri. Por përgjigja e Blankut ka qenë befasuese. Propozimi i tij ka qenë për ta rinovuar kontratën vetëm një sezon (pra deri më qershor të 2009-s) dhe për ta reduktuar pagën ndjeshëm.