Bugajski këshilltar i Pacollit për çështje ndërkombëtare

nga **LIHI** Wed Oct 10 2007, 06:37

Drejtori i Qendrës ndërkombëtare për studime strategjike me seli në Uashington, Janush Bugajski do të jetë koordinator i një grupi këshilltarësh ndërkombëtar, që do të punojnë për liderin e AKR-së, Behgjet Pacollin, në hartimin e strategjisë së zhvillimit të marrëdhënieve ndërkombëtare të Kosovës.
Grupi i Ekspertëve do të hartojë strategji të zhvillimit të Kosovës në rrafshin diplomatik por edhe për aspekte të tjera të ndërtimit të shtetit të Kosovës pas zgjidhjes së statusit. Gjatë promovimit të kësaj iniciative nga Pacolli e Bugajski, u tha se çështja e statusit është vetëm një pengesë në rrugën e shtetbërjes së Kosovës. Bugajski tha se tash duhet të filloj procesi i ndërtimit të shtetit të Kosovës. Ndërsa kreu i AKR-së, Pacolli tha se angazhimi i ekspertëve ndërkombëtar sidomos në fushën e diplomacisë me vendet e ndryshme të botës, ka një rëndësi të veçantë pasi sipas tij Kosovës i mungon diplomacia.
Ndryshe në ditën e dytë të konferencës “Qeveri efikase për shtet funksional” të organizuar, siç u bë e ditur në fund, nga angazhimi i Bugajskit në projektin politik të Behgjet Pacollit, u tha se moszgjidhja e statusit të Kosovës po pengon zhvillimin ekonomik, mirëpo statusi nuk është kushti i vetëm për të zgjidhur problemet e zhvillimit ekonomik në Kosovë. Gerall Knaus nga Iniciativa Evropiane për Stabilitet dhe Kenji Nakazava nga Banka Evropiane për Zhvillim dhe Rindërtim, theksuan nevojën e krijimit të politikave të favorshme ekonomike duke u bazuar edhe në përvojat e vendeve të rajonit.