Hagë: Trupi gjykues nuk i pranon si prova materiale disa “do

nga **LIHI** Wed Oct 10 2007, 06:41

Në Gjykatën ndërkombëtare të Hagës, ka vazhduar procesi gjyqësor ndaj ish-kryeministrit të Kosovës – Ramush Haradinajt dhe dy ish-bashkëluftëtarëve të tij – Idriz Balajt e Lahi Brahimajt. Në seancën e sotme gjyqësore, pas prokurorisë, mbrojtja e Haradinajt, Balajt e Brahimajt ka marrë në pyetje ish-shefin e Sektorit analitik të Shërbimit sekret serb në Prishtinë, Zoran Stijoviq.
Edhe në fillim të seancës së sotme, kryesuesi i Trupit gjykues, Alfons Orie, informoi palët e këtij procesi se trupi gjykues nuk mund t’i pranojë si prova materiale disa “dokumente” të UDB-së serbe lidhur me akuzat ndaj Ramush Haradinajt, Idriz Balajt dhe Lahi Brahimajt, të cilat është munduar t’i fusë jashtë procedurës së rregullt gjyqësore dëshmitari i Prokurorisë, ish-shefi i Sektorit analitik të Shërbimit sekret serb në Prishtinë, Zoran Stijoviq. Ndërkaq, duke u përgjigjur në pyetjet lidhur me veprimtarinë e këtij shërbimi në Kosovë, gjatë periudhës së luftës, Stijoviq, është munduar që të përmend disa nga zhvillimet më të rëndësishme, që nga ngjarjet e njohura në Likoshan, në Prekaz, Jabllanicë, Gllogjan e më gjerë. Stijoviq ka paraqitur edhe disa informata që gjoja kishte marrë shërbimi i sigurimit sekret serb nga disa ish - eprorë të FARK-ut.
Avokati Emersen, Gaj Smith e Harvi, kanë paraqitur kundër-argumentet e tyre lidhur me disa konstatime të paqëndrueshme të Stijoviqit ndaj të akuzuarve. Ata e pyetën atë edhe lidhur me përgjegjësinë e ish-drejtuesëve serbë për krimet mbi shqiptarët në Kosovë nga njësitë speciale dhe ato paramilitare serbe, duke përfshirë këtu edhe ato të Arkanit, por ai, si zakonisht, i bishtëronte përgjigjes.
Mbrojtja e Haradinajt, Balajt e Brahimajt, nesër do të vazhdojë me pyetjet e tjera drejtuar dëshmitarit Stijoviq lidhur me zhvillimet gjatë luftës në Kosovë, veçmas në Dukagjin.